Von Erika Hugentobler-Lützelschwab, Magden
Vor Churzem krieg ich «dicki» Poscht, jo, im Oktober schtönde Wahle a, bigoscht. Ich lauf eifach eso de Schtrosse entlang, do wird mir plötzlich Angscht und bang. Uf jedem Platz, a jeder Lampeschtange tuet es Bild vo Manne und Fraue hange. Sie lächle mir zue: «Bitte tue mi wähle, ich gib mis Beschte, uf mi chönnsch zähle».
Dehei i dr Poscht find ich es Lischte-Buech, jetz gilts, dass ich die richtige Persone suech. Me cha schtrieche, kumuliere, sogar kaschiere. So gits söttigi wo günne, söttigi wo verliere! Die Arbet sig schients schträng, aber guet entlöhnt, es git au Schpeese für die, wo würklich nach Bärn göhnd.
Söll ich mi ächt au bewärbe für e Nazionalrot? Ich weiss, für dieses Johr isch es scho z schpoht. Ich cha jo efang schicke e Foti ans Bundeshus als Bewärbig und hoff, si wähle mi denn us! D Verschtürig vo dr AHV-Ränte wär mis Motto fürs Plakat. Für ne Initiative zu däm Thema wär ich parat.
Ich hoff, die gwählte Persone erfülle d Verschpräche ihrer Wahl, sünscht isch s Vertraue bi de nächschte Wahle fatal!
